Álemdegi eń dáýletti adamnyń biri Ilon Mask taǵy bir bederli belesti eńserdi. SpaceX kompanııasynyń naryqtaǵy quny kúrt ósken soń, ol baılyǵy 600 mıllıard dollardan asqan alǵashqy adam atandy. Bul týraly Forbes málimdedi, dep jazady Egemen.kz.
Osylaısha Ilon Mask álemdegi tuńǵysh trıllıoner atanýǵa taǵy bir qadam jaqyndady. Buǵan SpaceX kompanııasynyń aksııalaryn keri satyp alý týraly usynysy sebep boldy. Kompanııanyń naryqtaǵy baǵasy 800 mıllıard dollarǵa jetti. SpaceX aksııasynyń shamamen 42 paıyzy Maskqa tıesili. Sonyń nátıjesinde onyń dáýleti birden 168 mıllıard dollarǵa ósip, jalpy kólemi 677 mıllıard dollarǵa jýyqtady.
Bul qadam SpaceX-tiń 2026 jyly bırjaǵa shyǵý jospary aıasynda jasalyp otyr. Investorlardyń aıtýynsha, IPO ótken jaǵdaıda kompanııanyń quny 1,5 trıllıon dollarǵa deıin kóterilýi múmkin.
Qazirgi tańda Masktyń eń qymbat aktıvi – SpaceX-tegi úlesi. Ol 336 mıllıard dollarǵa baǵalanady. Al Tesla kompanııasyndaǵy 12 paıyzdyq úlesiniń quny shamamen 197 mıllıard dollar.
Aıta ketý kerek, 2024 jyldyń qańtarynda Delaver shtatynyń soty Maskqa buryn berilgen syıaqy paketin jaramsyz dep tanydy. Degenmen Tesla aksıonerleri qarasha aıynda jańa, rekordtyq marapattaý tetigin bekitti. Eger kompanııa aldaǵy on jylda naryqtyq qunyn birneshe ese arttyra alsa, Mask qosymsha aksııalar arqyly 1 trıllıon dollarǵa deıin tabys tabýy múmkin.
Mıllıarderdiń ıeliginde xAI Holdings kompanııasy da bar. Qazir ol 230 mıllıard dollarlyq baǵamen jańa ınvestısııa tartý jóninde kelissózder júrgizip jatyr.
Sonymen birge Ilon Masktyń saıası jáne qoǵamdyq máselelerge qatysty ótkir pikirleri de jıi talqylanýda. Jýyrda ol X áleýmettik jelisine salynǵan 120 mıllıon eýro aıyppuldan keıin Eýropalyq odaqqa qatysty daýly málimdeme jasaǵan.